កម្មវិធីពលរដ្ឋឌីជីថល (CamVillage) ជា​ការធ្វើសមាហរណកម្ម​ស្វ័យប្រវត្តិកម្ម​នូវ​ដំណើរការ​ការងារ​ ការរក្សា​ចងក្រងឯកសារប្រជាពលរដ្ឋ ​ដែល​បច្ចុប្បន្នកំពុង​ធ្វើ​ដោយដៃ ដោយ​គ្របដណ្តប់​ទាំង​ការធ្វើ​នីយកម្ម​ពត៌មានរបស់ពលរដ្ឋ មួយវិញទៀតកម្មវិថីនេះអាចជួយសម្រួលដល់ការងារនៅមូលដ្ឋានរបស់ មេភូមិ​​​ មេឃុំ-ចៅសង្កាត់​ និងមេប៉ុស្តិ៍ ក្នុងការគ្រប់គ្រងទិន្នន័យ ឬកត់ត្រាព័ត៌មានរបស់​ប្រជាពលរដ្ឋដែលស្នាក់នៅក្នុងមូលដ្ឋានភូមិឃុំ តាមរយៈការប្រើប្រាស់ទូរសព្ទដៃវៃឆ្លាត ក្នុងគោលបំណងរក្សាសន្តិសុខ និងសណ្តាប់ធ្នាប់សាធារណៈ ស្របតាមគោលនយោបាយភូមិ ឃុំ-សង្កាត់ មានសុវត្ថិភាព។ មិនតែប៉ុណ្ណោះអាចរក្សាទុករាល់ឯកសារសាធារណៈដែលបានផ្តល់ជូនប្រជាពលរដ្ឋ ​បានយ៉ាងឆាប់រហ័ស មានប្រសិទ្ធភាព និងសុវត្ថិភាពខ្ពស់ ហើយងាយស្រួលទាញយកឯកសារបញ្ជាក់ជូនប្រជាពលរដ្ឋ ពេលមកស្នើសុំសេវាសាធារណៈផ្សេងៗ។ លើសពីនេះទៅទៀតកម្មវិធីនេះមានសារប្រយោជន៍មួយចំនួនដូចខាងក្រោម៖។

• ទទួលបានព័ត៌មានវិភាគភ្លាមៗ
• សមត្ថភាពផ្តល់របាយការណ៍បែបវិភាគក្នុងមូលដ្ឋានដែលខ្លួនបានចុះជួយ
• យន្តការអនុម័តដែលល្អប្រសើរ
• ការប្រើប្រាស់មានសុវត្តិភាពខ្ពស់ទាំងកម្មវិធីនិងទិន្នន័យ
• ថ្នាក់មូលដ្ឋាន(មេឃុំ មេភូមិ មេប៉ុស្តិ៍)
• ផ្តល់ភាពងាយស្រួលសម្រាប់ប្រើប្រាស់
• ផ្តល់នូវបុគ្គលភាពសម្រាប់ប្រើប្រាស់
• ធ្វើប្រតិបត្តិការជាកញ្ចប់ក្នុងពេលតែមួយ
• សមត្ថភាពផ្តល់របាយការណ៍បែបវិភាគក្នុងមូលដ្ឋានបានឆាប់រហ័ស និង ប្រសិទ្ធភាពខ្ពស់
• ទំនុកចិត្ត និងភាពជឿជាក់លើប្រព័ន្ធឌីជីថល

កម្មវិធីពលរដ្ឋឌីជីថល (CamVillage) នេះពិតជាមានសារសំខាន់ណាស់ក្នុងការផ្តោតទៅលើភាពជាអ្នកដឹកនាំឌីជីថល, បណ្តុំធនធានមនុស្សដែលមានទេពកោសល្យឌីជីថល, និងពលរដ្ឋឌីជីថល ទន្ទឹមនិងនេះដែររាជរដ្ឋាភិបាលបានបង្កើតក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ដើម្បីធ្វើការត្រួតពិនិត្យ គាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤សំដៅពង្រឹងការផ្តល់សេវាសាធារណៈនានាជូនប្រជាពលរដ្ឋ និងអភិវឌ្ឍសេដ្ឋកិច្ចសង្គមក្នុងមូលដ្ឋានរាជធានី ខេត្ត ប្រកបដោយគុណភាព ប្រសិទ្ធភាព និងបរិយាប័ន្ន ព្រមទាំងឈានទៅរកការគាំទ្រការអនុវត្តកម្មវិធីគោលនយោបាយរាជរដ្ឋាភិបាលឌីជីថលស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ ដែលចុះហត្ថលេខាដោយ សម្តេចអគ្គមហាសេនាបតីតេជោ ហ៊ុន សែន នៅថ្ងៃចន្ទទី១៤រោច ខែពិសាខ ឆ្នាំឆ្លូវត្រីស័ក ព.ស ២៥៦៥ ត្រូវនឹងថ្ងៃទី១០ ខែឧសភា ឆ្នាំ២០២១៕

១-បញ្ជីក្រុមគ្រួសារតាមខ្នងផ្ទះ ជាក្រុមគ្រួសារដែលយើងបានកត់ត្រាគាត់ជាគ្រួសារនិងសម្រាប់ តាមដានប្រវត្តិគ្រួសាររបស់គាត់ ។
២-បញ្ជីពលរដ្ឋ និងរបាយការណ៍អាយុ ជាចំនួនពលរដ្ឋសរុបដែលយើងបានកត់ត្រា និងសម្រាប់រាប់ចំនួនពលរដ្ឋតាមអាយុរបស់គាត់។
៣-ទិន្នន័យគ្មានរូបថត ជាព័ត៌មានពលរដ្ឋដែលយើងកត់ត្រាតែមិនទាន់បានបញ្ជូលរូបថតគាត់។
៤-មិនបានចាក់វ៉ាក់សាំង ជាចំនួនពលរដ្ឋដែលមិនបានចាក់វ៉ាក់សាំង។
៥-ពលរដ្ឋគ្មានអត្តសញ្ញាណបណ្ណ ជាចំនួនពលរដ្ឋ ដែលមិនទាន់បានធ្វើអត្តសញ្ញាណបណ្ណសញ្ជាតិខ្មែរ ឬក្មេងអាយុក្រោម១៥ឆ្នាំ។
៦-ភូមិ-ឃុំ-សង្កាត់មានសុវត្ថិភាព ជាមុខសញ្ញាដែលយើងបានកំណត់ចំពោះបុគ្គលសង្ស័យ។
៧-បណ្ណសមធម៌ សម្រាប់ពលរដ្ឋក្រីក្រ។
៨-ប្រកាសមរណភាព ពលរដ្ឋដែលបានស្លាប់។
៩-បញ្ជីពលរដ្ឋមិនបានចុះឈ្មោះបោះឆ្នោត សំដៅលើពលរដ្ឋដែលគ្រប់អាយុតែមិនទាន់បានចុះឈ្មោះបោះឆ្នោត។
១០-ពលរដ្ឋមានសិទ្ធិបោះឆ្នោត ពលរដ្ឋគ្រប់អាយុ និងបានទៅចុះឈ្មោះបោះឆ្នោតរួចរាល់។